ମଦୁରାଇ, ୩ ଅଗଷ୍ଟ - ସୋମବାର ଦିନ ତାମିଲନାଡୁର ମଦୁରାଇ ଜିଲ୍ଲାରେ ଏକ ସଡ଼କ ଦୁର୍ଘଟଣାରେ ଜଣେ ଶିଶୁ ସମେତ ଗୋଟିଏ ପରିବାରର ଚାରି ଜଣ ସଦସ୍ୟଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ତିନି ଜଣ ଗୁରୁତର ଆହତ ହୋଇଛନ୍ତି । ମେଲୁର ନିକଟରେ ଜାତୀୟ ରାଜପଥରେ ଏହି ଦୁର୍ଘଟଣା ଘଟିଥିଲା ଯେତେବେଳେ ଜଣେ କାର୍ ଡ୍ରାଇଭର ତାଙ୍କ ସାମ୍ନାରେ ଆସିଥିବା ଏକ ଦୁଇ ଚକିଆ ଯାନକୁ ବଂଚାଇବାକୁ ଚେଷ୍ଟା କରୁଥିବାବେଳେ ନିୟନ୍ତ୍ରଣ ହରାଇଥିଲେ । କାର୍ ଟି ଡିଭାଇଡରକୁ ଅତିକ୍ରମ କରିଥିଲା ଏବଂ ବିପରୀତ ଦିଗରୁ ଆସୁଥିବା ଅନ୍ୟ ଏକ କାର୍ ସହିତ ଧକ୍କା ହୋଇଥିଲା ।

 

ପୋଲିସର କହିବା ଅନୁଯାୟୀ, ଚେନ୍ନାଇର ପାଡିକୁପ୍ପମ ଅଂଚଳର ବାସିନ୍ଦା ଶ୍ରୀରାମ ତାଙ୍କ ପରିବାର ସହିତ ଛୁଟି କାଟିବା ପାଇଁ କାର୍ ରେ ମଦୁରାଇ ଯାଉଥିଲେ । ତାଙ୍କ କାର୍ ମେଲୁର ନିକଟସ୍ଥ ଥୁମ୍ବାଇପଟ୍ଟି ଗ୍ରାମ ନିକଟରେ ଏକ ଚାରି ଲେନ ବିଶିଷ୍ଟ ଜାତୀୟ ରାଜପଥ ଦେଇ ଯାଉଥିଲା । ଏହି ସମୟରେ ହଠାତ୍ ଏକ ଦୁଇ ଚକିଆ ଯାନ ରାସ୍ତା ପାର୍ ହେବାକୁ ଲାଗିଲା । ତାଙ୍କୁ ଧକ୍କା ଦେବା ଏଡ଼ାଇବାକୁ ଉଦ୍ୟମ କରି ଶ୍ରୀରାମ କାର୍ କୁ ଡାହାଣକୁ ତୀବ୍ର ଭାବରେ ବୁଲାଇ ଦେଇଥିଲେ ।

 

ଦ୍ରୁତ ଗତି ଯୋଗୁଁ ଡ୍ରାଇଭର ଗାଡ଼ି ଉପରୁ ନିୟନ୍ତ୍ରଣ ହରାଇଥିଲେ । କାର୍ ଟି ରାସ୍ତାର ଡିଭାଇଡରକୁ ଧକ୍କା ଦେଇଥିଲା ଏବଂ ଦ୍ୱିତୀୟ ଲେନ୍ ରେ ପହଂଚିଥିଲା, ଯେଉଁଠାରେ ଏହା ସମ୍ମୁଖରୁ ମଦୁରାଇରୁ ତିରୁଚିରାପଲ୍ଲୀ ଯାଉଥିବା ଅନ୍ୟ ଏକ କାର୍ ସହିତ ମୁହାଁମୁହିଁ ଧକ୍କା ହୋଇଥିଲା । ଧକ୍କା ଏତେ ଜୋରଦାର୍ ଥିଲା ଯେ ଉଭୟ ଗାଡି ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିଲା ।

 

ଶ୍ରୀରାମ, ତାଙ୍କ ପତ୍ନୀ ରକ୍ଷନା, ଶିଶୁ କନ୍ୟା ପ୍ରଣିତା ଏବଂ ସମ୍ପର୍କୀୟ ରାଜକୁମାରୀଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା । ଉଭୟ କାର୍ ରେ ଥିବା ଅନ୍ୟ ତିନି ଜଣ ବ୍ୟକ୍ତି ଗୁରୁତର ଆହତ ହୋଇଥିଲେ ଏବଂ ଗାଡ଼ିର ଭଗ୍ନାବଶେଷରେ ଫସି ରହିଥିଲେ ।

 

ଖବର ପାଇବା ପରେ ମେଲୁର ପୋଲିସ ଅଧୀକ୍ଷକ ଶିବକୁମାରଙ୍କ ନେତୃତ୍ୱରେ ପୋଲିସ ଏବଂ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଂଚି ଥିଲେ । ଉଦ୍ଧାରକାରୀମାନେ କ୍ଷତିଗ୍ରସ୍ତ କାର୍ ଗୁଡ଼ିକୁ କାଟି ଆହତଙ୍କୁ ବାହାରକୁ ବାହାର କରିଥିଲେ ଏବଂ ସେମାନଙ୍କୁ ମେଲୁର ସରକାରୀ ଡାକ୍ତରଖାନାକୁ ନେଇଥିଲେ, ଯେଉଁଠାରେ ସେମାନେ ଚିକିତ୍ସିତ ହେଉଛନ୍ତି ।