ନୂଆଦିଲ୍ଲୀ : ସର୍ବୋଚ୍ଚ ନ୍ୟାୟାଳୟ ଜଜ ହେବା ପାଇଁ ପ୍ରାରମ୍ଭିକ ପରୀକ୍ଷାରେ ସାମିଲ ହେବା ପାଇଁ ତିନି ବର୍ଷର ଅନିବାର୍ଯ୍ୟ ଓକିଲାତି ଅଭିଜ୍ଞତାକୁ କମାଇ ଏକ ବର୍ଷ କରିଦେଇଛନ୍ତି। ଚିଫ ଜଷ୍ଟିସ ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଥିବା ବେଂଚ ୨-୧ ଅଧିକାଂଶରେ ରାୟ ଦେଇଛନ୍ତି ଯେ ଜଜ ହେବାର ପରୀକ୍ଷାରେ ଚୟନିତ ଅଭ୍ୟର୍ଥୀମାନଙ୍କୁ ଜୁଡିଶିଆଲ ଏକାଡେମୀରେ ଟ୍ରେନିଂ ନେବା ବ୍ୟତୀତ ଏକ ବର୍ଷର କ୍ଲର୍କଶିପ ମଧ୍ୟ କରିବାକୁ ପଡ଼ିବ।

ସର୍ବୋଚ୍ଚ ନ୍ୟାୟାଳୟ କହିଛନ୍ତି ଯେ ମେ ୨୦୨୫ ଏବଂ ମାର୍ଚ୍ଚ ୨୦୨୭ ମଧ୍ୟରେ ଆୟୋଜିତ ପରୀକ୍ଷାରେ ସାମିଲ ହେଉଥିବା ଅଭ୍ୟର୍ଥୀମାନଙ୍କୁ ସେମାନଙ୍କ ପୁରୁଣା ଅଭିଜ୍ଞତାର ଲାଭ ମିଳିବ। କହି ରଖୁଛୁ ଯେ ୨୦ ମେ ୨୦୨୫ରେ ସର୍ବୋଚ୍ଚ ନ୍ୟାୟାଳୟ ଜଜ ହେବା ପାଇଁ ତିନି ବର୍ଷ ପର୍ଯ୍ୟନ୍ତ ଓକିଲାତିର ଅଭିଜ୍ଞତାର ଅନିବାର୍ଯ୍ୟତା ପୁନଃସ୍ଥାପନ କରିବାକୁ ଆଦେଶ ଦେଇଥିଲେ। ଏହି ଆଦେଶକୁ ଚ୍ୟାଲେଞ୍ଜ କରି ସର୍ବୋଚ୍ଚ ନ୍ୟାୟାଳୟରେ ପୁନର୍ବିଚାର ଯାଚିକା ଦାଖଲ କରାଯାଇଥିଲା।

ବରିଷ୍ଠ ଓକିଲ କଲିନ ଗୋଞ୍ଜାଲଭେସ ଦାଖଲ କରିଥିବା ଯାଚିକାରେ କହିଛନ୍ତି ଯେ ସର୍ବୋଚ୍ଚ ନ୍ୟାୟାଳୟ ପାଂଚଟି ଲ ଆୟୋଗର ରିପୋର୍ଟ ଉପରେ ବିଚାର କରିନାହାନ୍ତି, ଯେଉଁଥିରେ ସର୍ବସମ୍ମତିକ୍ରମେ ଜଜ ହେବା ପାଇଁ ଓକିଲ ଭାବେ ତିନି ବର୍ଷର ପ୍ରାକ୍ଟିସ କରିବା କଥାକୁ ଖାରଜ କରାଯାଇଥିଲା । ଯାଚିକାରେ ଦ୍ୱିତୀୟ ନ୍ୟାୟିକ ବେତନ ଆୟୋଗ ୨୦୨୨ର ରିପୋର୍ଟର ଉଲ୍ଲେଖ କରାଯାଇଥିଲା, ଯେଉଁଥିରେ ଏପରି କୌଣସି ବାଧ୍ୟତା ଲାଗୁ କରିବା ପୂର୍ବରୁ ସମସ୍ତ ପକ୍ଷଙ୍କ ସହ ପରାମର୍ଶ କରିବା ଉପରେ ଜୋର ଦିଆଯାଇଛି।

ବାସ୍ତବରେ, ଆରମ୍ଭରେ ଜଜ ପଦରେ ନିଯୁକ୍ତ ହେବା ପାଇଁ ଓକିଲ ଭାବେ ତିନି ବର୍ଷର ଅଭିଜ୍ଞତା ଅନିବାର୍ଯ୍ୟ ଥିଲା କିନ୍ତୁ ୨୦୦୨ରେ ସର୍ବୋଚ୍ଚ ନ୍ୟାୟାଳୟ ତିନି ବର୍ଷର ଅଭିଜ୍ଞତାକୁ ସମାପ୍ତ କରି ନୂଆ ଲ ଗ୍ରାଜୁଏଟଙ୍କୁ ମଧ୍ୟ ଜଜ ପଦରେ ନିଯୁକ୍ତି ପାଇଁ ଆବେଦନ କରିବାର ରାସ୍ତା ଖୋଲି ଦେଇଥିଲେ।