ନୂଆଦିଲ୍ଲୀ : ଭାରତୀୟ ଜନତା ପାର୍ଟି (ବିଜେପି) ସଂସଦ ମାର୍ଗ ଥାନା ବାହାରେ ରାହୁଲ ଗାନ୍ଧୀଙ୍କ କରାଯାଇଥିବା ବିରୋଧ ପ୍ରଦର୍ଶନ ଉପରେ ତୀବ୍ର ଆକ୍ରମଣ କରିଛି। ବିଜେପି ଅନୁଯାୟୀ ଯେଉଁ ମାମଲାକୁ ନେଇ ରାହୁଲ ଗାନ୍ଧୀ ଧାରଣା ଦେଉଛନ୍ତି, ତାହାର ତଦନ୍ତ ପାଇଁ ସୁପ୍ରିମକୋର୍ଟ ପୂର୍ବରୁ ହିଁ ଉଚ୍ଚସ୍ତରୀୟ କମିଟି ଗଠନ କରିଛନ୍ତି। ରାହୁଲ ଗାନ୍ଧୀ ବିନା ପୂର୍ବ ଅନୁମତିରେ ସଂସଦ ମାର୍ଗ ଥାନା ବାହାରେ ଧାରଣାରେ ବସିଥିଲେ, ଯେତେବେଳେ କି ପୁଲିସ ପୂର୍ବରୁ ସ୍ପଷ୍ଟ କରିଥିଲା ଯେ ମାମଲାରେ ଏଫଆଇଆର ରୁଜୁ ହୋଇଛି ଏବଂ ତଦନ୍ତ ଜାରି ରହିଛି।

ବିଜେପି ସାଂସଦ ରବିଶଙ୍କର ପ୍ରସାଦ ଶୁକ୍ରବାର ଗଣମାଧ୍ୟମ ସହ କଥାବାର୍ତାରେ କହିଛନ୍ତି ଯେ ଏହି ମାମଲାରେ ଗଠିତ କମିଟିର ଅଧ୍ୟକ୍ଷତା ସୁପ୍ରିମକୋର୍ଟର ଜଣେ ଅବସରପ୍ରାପ୍ତ ବିଚାରପତି କରୁଛନ୍ତି। ଏହା ବ୍ୟତୀତ ଏଥିରେ ଅନ୍ୟ ଦୁଇଜଣ ବିଚାରପତି, ସିବିଆଇର ପୂର୍ବତନ ନିର୍ଦ୍ଦେଶକ ଏବଂ ଅନ୍ୟ ଜଣେ ବରିଷ୍ଠ ଅଧିକାରୀ ସାମିଲ ଅଛନ୍ତି। ସେ କହିଛନ୍ତି ଯେ ଗୁଳି ଚାଲିଥିଲା କି ନାହିଁ, ଏହା ମଧ୍ୟ ଏହି କମିଟିର ତଦନ୍ତର ବିଷୟ। ରାହୁଲ ଗାନ୍ଧୀଙ୍କୁ ଟାର୍ଗେଟ କରି ସେ କହିଛନ୍ତି, ରାହୁଲ ଗାନ୍ଧୀଙ୍କର ଆଇନର ଶାସନ ପ୍ରତି କୌଣସି ସମ୍ମାନ ନାହିଁ କି? ସେ କି ନିଜ ଇଚ୍ଛା ଅନୁଯାୟୀ ଯେକୌଣସି ସ୍ଥାନକୁ ଯାଇ ଧାରଣା ଦେବେ ଏବଂ ଅରାଜକତା ବିସ୍ତାର କରିବେ?'

ବିଜେପି ସାଂସଦ ରବିଶଙ୍କର ପ୍ରସାଦ ରାହୁଲ ଗାନ୍ଧୀଙ୍କ ଉପରେ ଅରାଜକତାର ରାଜନୀତି କରିବାର ଅଭିଯୋଗ ଲଗାଇ କହିଛନ୍ତି ଯେ ସେ ବିନା ଅନୁମତି କିମ୍ବା ପୂର୍ବ ସୂଚନାରେ ପାର୍ଲାମେଂଟ ଷ୍ଟ୍ରିଟ୍ ପୁଲିସ ଷ୍ଟେସନ ବାହାରେ ଧାରଣାରେ ବସିଛନ୍ତି। ସେ କହିଛନ୍ତି ଯେ ପୁଲିସ ରାହୁଲ ଗାନ୍ଧୀଙ୍କୁ ସୂଚନା ଦେଇଛି ଯେ ସେ ଯେଉଁ ଘଟଣାର ଉଲ୍ଲେଖ କରୁଛନ୍ତି, ସେଥିରେ ପୂର୍ବରୁ ହିଁ ଏଫଆଇଆର ରୁଜୁ ହୋଇସାରିଛି ଏବଂ ମାମଲାର ତଦନ୍ତ ଚାଲିଛି। ସେ କହିଛନ୍ତି ଯେ ସୁପ୍ରିମକୋର୍ଟ ମଧ୍ୟ ଏହି ମାମଲାର ତଦନ୍ତ ପାଇଁ ଏକ ହାଇ-ପାୱାର୍ଡ କମିଟି ଗଠନ କରିଛନ୍ତି।