ହାଇଦ୍ରାବାଦ, ୨୨ ଅଗଷ୍ଟ :- ତେଲଙ୍ଗାନାର ୟାଦାଦ୍ରି-ଭୁବନଗିରି ଜିଲ୍ଲାର ଭୁଦାନ ପୋଚମପଲ୍ଲି ମଣ୍ଡଳର ଦୋଥିଗୁଡେମ ଗାଁ ନିକଟରେ ଥିବା ଏକ ଔଷଧ କାରଖାନାରେ ଶୁକ୍ରବାର ରାତିରେ ରିଆକ୍ଟରରେ ବିସ୍ଫୋରଣ ଘଟିଛି। ଦୁର୍ଘଟଣାରେ ଦୁଇ ଶ୍ରମିକଙ୍କ ମୃତ୍ୟୁ ହୋଇଥିବାବେଳେ, ଅନ୍ୟ ଦୁଇଜଣଙ୍କ ଅବସ୍ଥା ଗୁରୁତର ବୋଲି କୁହାଯାଉଛି। ଘଟଣାରେ ମୋଟ ୧୦ ଜଣ ଶ୍ରମିକ ଆହତ ହୋଇଛନ୍ତି।

କୁହାଯାଇଛି ଯେ ଦୁର୍ଘଟଣା ରାତି ପାଳି ସମୟରେ ଘଟିଥିଲା। ରିଆକ୍ଟରରେ ହଠାତ୍ ବିସ୍ଫୋରଣ ପରେ କାରଖାନାରେ ଭୟଙ୍କର ନିଆଁ ଲାଗିଯାଇଥିଲା ଏବଂ ସମଗ୍ର ଅଂଚଳରେ ଘନ ଧୂଆଁ ବ୍ୟାପିଯାଇଥିଲା। ରିଆକ୍ଟର ନିକଟରେ କାମ କରୁଥିବା ବିହାରର ଶ୍ରମିକମାନଙ୍କ ସମେତ ୧୦ ଜଣ କର୍ମଚାରୀ ଏହାର ଶିକାର ହୋଇଥିଲେ। କମ୍ପାନୀ ପରିଚାଳନା ଆହତମାନଙ୍କୁ ତୁରନ୍ତ ଚିକିତ୍ସା ପାଇଁ ହାଇଦ୍ରାବାଦର ଏକ ଘରୋଇ ହସ୍ପିଟାଲରେ ଭର୍ତି କରାଇଥିଲା।

ତୀବ୍ର ବିସ୍ଫୋରଣରେ କାରଖାନାରେ କାମ କରୁଥିବା ଶ୍ରମିକମାନଙ୍କ ମଧ୍ୟରେ ହଡ଼କମ୍ପ ସୃଷ୍ଟି ହୋଇଥିଲା ଏବଂ ଆଖପାଖ ଗାଁଗୁଡ଼ିକରେ ମଧ୍ୟ ଆତଙ୍କ ବ୍ୟାପିଯାଇଥିଲା। ଘଟଣାର ସୂଚନା ପାଇବା ମାତ୍ରେ ଚୌଟୁପ୍ପଲ ଗ୍ରାମୀଣ ସର୍କିଲ ଇନ୍ସପେକ୍ଟର (ସିଆଇ) ସତୀଶ ରେଡ୍ଡୀ, ସବ୍-ଇନ୍ସପେକ୍ଟର (ଏସଆଇ) ଜଗନଙ୍କ ସମେତ ପୁଲିସକର୍ମୀମାନେ ଘଟଣାସ୍ଥଳରେ ପହଂଚିଥିଲେ। ଦମକଳ ଗାଡ଼ିଗୁଡ଼ିକ ମଧ୍ୟ ଘଟଣାସ୍ଥଳରେ ପହଂଚିି ନିଆଁକୁ ଆୟତ କରିଥିଲେ।

କୁହାଯାଇଛି ଯେ ଏହି କମ୍ପାନୀରେ ଗତ ମାସରେ ମଧ୍ୟ ଏକ ଦୁର୍ଘଟଣା ଘଟିଥିଲା, ଯେଉଁଥିରେ ଜଣେ ଶ୍ରମିକଙ୍କ ମୃତ୍ୟୁ ହୋଇଥିଲା। କ୍ରମାଗତ ଭାବେ ଘଟୁଥିବା ଦୁର୍ଘଟଣାକୁ ନେଇ ଆଖପାଖ ଗ୍ରାମବାସୀଙ୍କ ମଧ୍ୟରେ ଚିନ୍ତା ଏବଂ ଭୟର ପରିବେଶ ରହିଛି।

ଉଲ୍ଲେଖନୀୟ ଯେ ହାଇଦ୍ରାବାଦ ନିକଟରେ ଅବସ୍ଥିତ ପୋଚମପଲ୍ଲି ଗାଁ ବିନୋବା ଭାବେଙ୍କ ଭୁଦାନ ଆନ୍ଦୋଳନର ଆରମ୍ଭ ପାଇଁ ପରିଚିତ। ପୋଚମପଲ୍ଲି ନିଜର ପ୍ରସିଦ୍ଧ ରେଶମୀ ଶାଢ଼ି ପାଇଁ ମଧ୍ୟ ପ୍ରସିଦ୍ଧ।