ଗୌହାଟୀ, ୮ ଅଗଷ୍ଟ - ଆସାମର ସ୍ୱତନ୍ତ୍ର ଟାସ୍କ ଫୋର୍ସ (ଏସ୍. ଟି. ଏଫ୍.) ବନ୍ୟଜନ୍ତୁ ଚୋରାଚାଲାଣ ବିରୋଧରେ ଅଭିଯାନ ଚଳାଇବା ସମୟରେ ତାମୁଲପୁରରେ ଦୁଇଟି ହାତୀ ଦାନ୍ତ ସହିତ ଦୁଇ ଜଣଙ୍କୁ ଗିରଫ କରିଛି । ଉଦ୍ଧାର ହୋଇଥିବା ହାତୀଦାନ୍ତର ମୋଟ୍ ଓଜନ ପ୍ରାୟ ଚାରି କିଲୋଗ୍ରାମ ।

 

ଏକ ଗୁପ୍ତ ସୂଚନା ଆଧାରରେ, ଏସ୍. ଟି. ଏଫ୍. ଗତକାଲି ରାତିରେ ତାମୁଲପୁରର ବଙ୍ଗାଲିପାଡ଼ାରେ ଏକ ଅପରେସନ କରିଥିଲା । ଉଭୟ ତାମୁଲପୁରର ବାସିନ୍ଦା ଗୁହୱାମ ବସୁମତାରୀ (୨୯) ଏବଂ ସ୍ୱାଦୱାବମା ବସୁମତାରୀ (୨୩) ଙ୍କୁ ହେପାଜତରେ ନିଆଯାଇଛି ।

 

ଖୋଜାଖୋଜି ସମୟରେ, ଏସ୍. ଟି. ଏଫ୍. ଦଳ ଦୁଇଟି ହାତୀ ଦାନ୍ତ ଉଦ୍ଧାର କରିଥିଲେ । ଗୋଟିଏ ଦାନ୍ତର ଓଜନ ୨.୦୯ କେଜି ଏବଂ ଅନ୍ୟଟିର ୧.୯୭ କେଜି ଥିଲା । ପଚରାଉଚରା ବେଳେ ଜଣାପଡ଼ିଥିଲା ଯେ, ଦୁଇ ଅଭିଯୁକ୍ତ ହାତୀଦାନ୍ତକୁ ପ୍ରାୟ ଛଅ ଲକ୍ଷ ଟଙ୍କାରେ ବିକ୍ରି କରିବାକୁ ଉଦ୍ୟମ କରୁଥିଲେ । ଏଥିପାଇଁ କିଲୋଗ୍ରାମ ପିଛା ପ୍ରାୟ ୧.୫ ଲକ୍ଷ ଟଙ୍କା ଦରରେ ଏକ ଡିଲ୍ ସ୍ଥିର କରାଯାଇଥିବା ଜଣାପଡ଼ିଛି ।

 

ଅପରେସନ୍ ପରେ, ଏସ୍. ଟି. ଏଫ୍. ଗିରଫ ଅଭିଯୁକ୍ତ, ଜବତ ହାତୀଦାନ୍ତ ଏବଂ ଅନ୍ୟାନ୍ୟ ଜବତ ସାମଗ୍ରୀକୁ ଆବଶ୍ୟକ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଜଙ୍ଗଲ ବିଭାଗକୁ ହସ୍ତାନ୍ତର କରିଛି । ଏ ସଂକ୍ରାନ୍ତରେ ଏକ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଛି ।

 

ଅନୁସନ୍ଧାନକାରୀ ସଂସ୍ଥାଗୁଡ଼ିକ ବନ୍ୟଜନ୍ତୁ ଏବଂ ସେମାନଙ୍କ ଅଙ୍ଗଗୁଡ଼ିକର ବେଆଇନ ତସ୍କରୀରେ ସମ୍ପୃକ୍ତ ଆନ୍ତଃରାଜ୍ୟ ଏବଂ ଦେଶବ୍ୟାପୀ ନେଟୱାର୍କର ସନ୍ଧାନ କରିବା ସହିତ ସିଣ୍ଡିକେଟ୍ ସହିତ ଜଡ଼ିତ ଅନ୍ୟମାନଙ୍କୁ ଚିହ୍ନଟ କରିବା ପ୍ରକ୍ରିୟାରେ ଅଛନ୍ତି । ଏସ୍. ଟି. ଏଫ୍. କହିଛି ଯେ, ଏହି ଅପରେସନ୍ ସଂଗଠିତ ବନ୍ୟଜନ୍ତୁ ଅପରାଧ ଉପରେ ଏହାର ନିରନ୍ତର ଜାରି କାର୍ଯ୍ୟାନୁଷ୍ଠାନର ଏକ ଅଂଶ ।