ନୂଆଦିଲ୍ଲୀ, ୨୨ ଅଗଷ୍ଟ : କେନ୍ଦ୍ର ସରକାର ଟିଭି ଚ୍ୟାନେଲଗୁଡ଼ିକରେ ବିଜ୍ଞାପନ ପ୍ରସାରଣର ୧୨ ମିନିଟର ସୀମାକୁ ହଟାଇ ଦେଇଛନ୍ତି। ଏ ସମ୍ପର୍କରେ କେବଳ ଟେଲିଭିଜନ ନେଟୱର୍କ ନିୟମ ୧୯୯୪ରେ ସଂଶୋଧନର ଗେଜେଟ ବିଜ୍ଞପ୍ତି ୨୧ ଅଗଷ୍ଟ ୨୦୨୬ରେ ଜାରି କରାଯାଇଛି, ଯାହା ସହିତ ନୂଆ ନିୟମ ପ୍ରଭାବୀ ହୋଇଛି।

ସୂଚନା ଓ ପ୍ରସାରଣ ମନ୍ତ୍ରଣାଳୟ ଶନିବାର ଜାରି କରିଥିବା ବିବୃତିରେ କହିଥିଲା ଯେ ବିଜ୍ଞାପନ ଅବଧିର ସୀମା ହଟାଇବାର ନିଷ୍ପକ୍ଷି ଟିଭି ପ୍ରସାରଣ କ୍ଷେତ୍ରରେ ନିରପେକ୍ଷ ପ୍ରତିଯୋଗିତା ଏବଂ ବ୍ୟବସାୟରେ ସୁଗମତା ସୁନିଶ୍ଚିତ କରିବା ପାଇଁ ନିଆଯାଇଛି।

ଟିଭି ଚ୍ୟାନେଲଗୁଡ଼ିକ ପାଇଁ ୧୨ ମିନିଟର ବିଜ୍ଞାପନ ସୀମା ବର୍ଷ ୨୦୦୬ରେ ଲାଗୁ କରାଯାଇଥିଲା। ସେତେବେଳେ ଦେଶରେ କେବଳ ୬୨ଟି ଟିଭି ଚ୍ୟାନେଲ ଥିଲା। ଏବେ ଏହାର ସଂଖ୍ୟା ୯୦୦ରୁ ଅଧିକ ହୋଇସାରିଛି। ଏହା ବ୍ୟତୀତ କେବଲ ଟିଭିର ଡିଜିଟାଲୀକରଣ ପରେ ଡିଟିଏଚ କେବଲ, ଭଳି ପ୍ଲାଟଫର୍ମରେ ଦର୍ଶକମାନଙ୍କ ପାଇଁ ବହୁ ସଂଖ୍ୟାରେ ଚ୍ୟାନେଲ ଉପଲବ୍ଧ ଅଛି।

ସୂଚନା ଓ ପ୍ରସାରଣ ମନ୍ତ୍ରଣାଳୟ ଅନୁଯାୟୀ, ଟିଭି ଶିଳ୍ପରେ ଏବେ ପର୍ଯ୍ୟାପ୍ତ ପ୍ରତିଯୋଗିତା ରହିଛି। ଅନ୍ୟପଟେ ଡିଜିଟାଲ ମିଡିଆରେ ବିଜ୍ଞାପନ ଅବଧିର ଏପରି କୌଣସି ସୀମା ନଥିବାରୁ ପାରମ୍ପରିକ ଟିଭି ଚ୍ୟାନେଲଗୁଡ଼ିକ ପାଇଁ ସମାନ ସୁଯୋଗର ପ୍ରସଙ୍ଗ ମଧ୍ୟ ଥିଲା।

ସରକାରଙ୍କ ମତ ହେଉଛି ଯେ ବିଜ୍ଞାପନ ଅବଧିର ସୀମା ହଟିବା ଦ୍ୱାରା ଟିଭି ଚ୍ୟାନେଲଗୁଡ଼ିକୁ ବିଜ୍ଞାପନ ବଜାରରେ ଅଧିକ ନମନୀୟତା ମିଳିବ ଏବଂ ଇଜ ଅଫ ଡୁଇଂ ବିଜନେସକୁ ପ୍ରୋତ୍ସାହନ ମିଳିବ।

ଏବେ ଟିଭି ଚ୍ୟାନେଲଗୁଡ଼ିକରେ ବିଜ୍ଞାପନର ସର୍ବାଧିକ ୧୨ ମିନିଟର ନିର୍ଦ୍ଧାରିତ ସୀମା ଲାଗୁ ରହିବ ନାହିଁ।