ଭୁବନେଶ୍ୱର, 14 ଜୁନ୍ : କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ଭାରତ ବର୍ତ୍ତମାନ କେବଳ ଚିକିତ୍ସାକେନ୍ଦ୍ରିକ ସ୍ୱାସ୍ଥ୍ୟ ବ୍ୟବସ୍ଥାରେ ସୀମିତ ନ ରହି ପ୍ରତିଷେଧକ ସ୍ୱାସ୍ଥ୍ୟସେବା, ସମୟୋପଯୁକ୍ତ ରୋଗ ଚିହ୍ନଟ ଏବଂ ସମଗ୍ର ସ୍ୱାସ୍ଥ୍ୟ ମଡେଲ ଦିଗରେ ଦ୍ରୁତ ଗତିରେ ଆଗେଇ ଚାଲିଛି।
ସୋସିଆଲ ମିଡିଆରେ ପ୍ରକାଶିତ ଏକ ବାର୍ତ୍ତାରେ ସେ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଦେଶ ‘ସମଗ୍ର ସ୍ୱାସ୍ଥ୍ୟ’ର ଲକ୍ଷ୍ୟକୁ ସାକାର କରିବା ଦିଗରେ ନିରନ୍ତର ପଦକ୍ଷେପ ନେଉଛି। ଏହା ଅନ୍ତର୍ଗତ ପ୍ରତିଷେଧକ ସ୍ୱାସ୍ଥ୍ୟସେବାକୁ ସୁଦୃଢ଼ କରାଯାଉଥିବା ବେଳେ ରୋଗର ପ୍ରାରମ୍ଭିକ ଚିହ୍ନଟକୁ ପ୍ରୋତ୍ସାହନ ଦିଆଯାଉଛି ଏବଂ ଗୁଣାତ୍ମକ ସ୍ୱାସ୍ଥ୍ୟସେବାକୁ ଅଧିକ ସୁଲଭ ଓ ସମାବେଶୀ କରାଯାଉଛି।
ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ଏକ ବିକଶିତ ଭାରତ ଗଠନ ପାଇଁ ସୁସ୍ଥ, ସଶକ୍ତ ଓ ସଚେତନ ସମାଜ ଅତ୍ୟାବଶ୍ୟକ। ସ୍ୱାସ୍ଥ୍ୟ କ୍ଷେତ୍ରରେ କରାଯାଉଥିବା ସଂସ୍କାର ଓ ସୁଧାର ଦେଶକୁ ସମାବେଶୀ ବିକାଶ ଏବଂ ଉନ୍ନତ ଜୀବନମାନ ଦିଗରେ ଆଗକୁ ନେଉଥିବା ସେ ଉଲ୍ଲେଖ କରିଛନ୍ତି।
