ଅନୁଗୁଳ, ୨୮ ଜୁନ୍ - ଚଳନ୍ତା ବସ୍ ରେ ନିଆଁ । ଜାତୀୟ ରାଜପଥରେ ହଠାତ୍ ହୁତୁହୁତୁ ହୋଇ ଜଳିଗଲା ଯାତ୍ରୀବାହୀ ବସ୍ । ନିମିଷକ ମଧ୍ୟରେ ପୋଡି ପାଉଁଶ ହୋଇଗଲା ବସ୍ । ତେବେ ଡ୍ରାଇଭରଙ୍କ ଉପସ୍ଥିତ ବୁଦ୍ଧି ଯୋଗୁ ବଡ଼ ଦୁର୍ଘଟଣାରୁ ଅଳ୍ପକେ ବର୍ତିଛନ୍ତି ବସ୍ ରେ ଯାତ୍ରା କରୁଥିବା ୪୦ରୁ ଅଧିକ ଯାତ୍ରୀ । ବସ୍ ଟି ରାଉରକେଲାରୁ ପାରାଦୀପ ଅଭିମୁଖେ ଆସୁଥିବା ବେଳେ ଅନୁଗୁଳ ଜିଲ୍ଲାର ଖମାର ନିକଟରେ ଜଳିଯାଇଛି । ଘଟଣାସ୍ଥଳରେ ଅଗ୍ନିଶମ ବାହିନୀ ପହଂଚି ନିଆଁକୁ ଆୟତ କରିଛନ୍ତି ।

 

ସୂଚନା ମୁତାବିକ, ଗତକାଲି ବିଳମ୍ବିତ ରାତିରେ ଶ୍ରୀମା ନାମକ ଏକ ଘରୋଇ ଯାତ୍ରୀବାହୀ ବସ୍ ରାଉରକେଲାରୁ ପାରାଦୀପ ଅଭିମୁଖେ ଆସୁଥିଲା । ହଠାତ୍ ଅନୁଗୁଳ ଜିଲ୍ଲାର ଖମାର ଥାନା ଅନ୍ତର୍ଗତ ବାରକୋଟିଆ ନିକଟରେ ବସ୍ ରେ ନିଆଁ ଲାଗିଥିଲା । ବସ୍ ର ଏସି ୟୁନିଟ୍ ରୁ ପ୍ରଥମେ ନିଆଁ ଲାଗିଥିଲା । ନିଆଁ ଏତେ ଭୟଙ୍କର ଥିଲା ଯେ ଦେଖୁ ଦେଖୁ ସାରା ବସ୍ ରେ ବ୍ୟାପି ଯାଇଥିଲା । ଚାଳକ ତୁରନ୍ତ ଯାତ୍ରୀମାନଙ୍କୁ ବସ୍ ରୁ ଓହ୍ଲାଇ ଯିବାକୁ କହିଥିଲେ । ଯାତ୍ରୀମାନେ ବସ୍ ରୁ ଓହ୍ଲାଇ ବାହାରକୁ ଚାଲି ଆସିଥିଲେ । ଯାହା ଫଳରେ ଏକ ବଡ଼ ଦୁର୍ଘଟଣାରୁ ୪୦ରୁ ଅଧିକ ଯାତ୍ରୀ ଅଳ୍ପକେ ବର୍ତି ଯାଇଛନ୍ତି । ଖବର ପାଇ ଅଗ୍ନିଶମ ବାହିନୀର ଟିମ୍ ଘଟଣାସ୍ଥଳରେ ପହଂଚି ନିଆଁକୁ ଆୟତ କରିଛନ୍ତି । ସଟ୍ ସର୍କିଟ୍ ରୁ ନିଆଁ ଲାଗିଥିବା ଅନୁମାନ କରାଯାଉଛି ।