ଶିମଲା, ୨୮ ଜୁନ୍ - ହିମାଚଳ ପ୍ରଦେଶର ରାଜଧାନୀ ତଥା ପାହାଡ ଷ୍ଟେସନ ଶିମଲାରେ ପର୍ଯ୍ୟଟନ ଋତୁ ଶୀର୍ଷରେ ରହିଛି ଏବଂ ଜୁନ୍ ମାସର ଶେଷ ସପ୍ତାହରେ ସହର ଏବଂ ଆଖପାଖ ପର୍ଯ୍ୟଟନ ସ୍ଥଳୀ ଗୁଡିକରେ ପର୍ଯ୍ୟଟକଙ୍କ ଭିଡ଼ ଦେଖିବାକୁ ମିଳିଛି । ଉତର ଭାରତର ସମତଳ ଅଂଚଳରେ ତୀବ୍ର ଉତାପରୁ ମୁକ୍ତି ପାଇବା ପାଇଁ ବହୁ ସଂଖ୍ୟକ ପର୍ଯ୍ୟଟକ ଶିମଲା ଏବଂ ଏହାର ଆଖପାଖ ଅଂଚଳକୁ ଯାଉଛନ୍ତି । ପର୍ଯ୍ୟଟନ ବ୍ୟବସାୟ ସହିତ ଜଡ଼ିତ ଲୋକଙ୍କ କହିବା ଅନୁଯାୟୀ, ସହରର ଅଧିକାଂଶ ହୋଟେଲ, ଅତିଥି ଭବନ ଏବଂ ହୋମଷ୍ଟେ ଏହି ସପ୍ତାହ ଶେଷରେ ପ୍ରାୟ ୯୦ ପ୍ରତିଶତ ପୂର୍ଣ୍ଣ ହୋଇଯାଇଛି ।

 

ଶିମଲାରେ ପର୍ଯ୍ୟଟନ ଋତୁ ଆନୁଷ୍ଠାନିକ ଭାବରେ ଅପ୍ରେଲ ୧୫ରୁ ଜୁଲାଇ ୧୫ ତାରିଖ ପର୍ଯ୍ୟନ୍ତ ବିବେଚନା କରାଯାଏ । କିନ୍ତୁ ସାଧାରଣତଃ ଜୁଲାଇର ପ୍ରାରମ୍ଭିକ ଦିନରେ ମୌସୁମୀ ଆରମ୍ଭ ହେବା ସହିତ ପର୍ଯ୍ୟଟକଙ୍କ ସଂଖ୍ୟା ହ୍ରାସ ପାଇବା ଆରମ୍ଭ କରେ । ତେଣୁ, ଚଳିତ ସପ୍ତାହାନ୍ତକୁ ଚଳିତ ଋତୁର ଶେଷ ବଡ଼ ପର୍ଯ୍ୟଟନ ସପ୍ତାହାନ୍ତ ଭାବେ ବିବେଚନା କରାଯାଉଛି । ସିମଲାର ଐତିହାସିକ ରିଜ୍ ମଇଦାନ, ମଲ୍ ରୋଡ୍, ମନ୍ଦିର ଏବଂ ଅନ୍ୟାନ୍ୟ ପର୍ଯ୍ୟଟନ ସ୍ଥଳୀରେ ପର୍ଯ୍ୟଟକଙ୍କ ଭଲ ଭିଡ଼ ଦେଖିବାକୁ ମିଳୁଛି । ଏଥି ସହିତ, ବହୁ ସଂଖ୍ୟକ ପର୍ଯ୍ୟଟକ ଶିମଲା ସଂଲଗ୍ନ ପ୍ରମୁଖ ପର୍ଯ୍ୟଟନ ସ୍ଥଳୀ କୁଫ୍ରି, ଫାଗୁ ଏବଂ ନାରକଣ୍ଡା ମଧ୍ୟ ପହଂଚୁଛନ୍ତି । କାଲକା-ଶିମଲା ଜାତୀୟ ରାଜପଥରେ ଶିମଲା ସହରର ପ୍ରବେଶ ପଥରେ ଯାନବାହାନର ଲମ୍ବା ଧାଡି ଲାଗିଛି ।